Ang kaganapang ito ay isang mahalagang hakbang sa patuloy na pagsusumikap ng Hingyon tungo sa digital na pagbabago at mas pinahusay na serbisyong pampubliko, alinsunod sa layunin ng pambansang pamahalaan na magkaroon ng mas tapat, episyente, at abot-kayang serbisyo para sa lahat.

Sa pamamagitan ng eLGU System, mas madali na ngayong makakakuha ng mahahalagang serbisyo ang mga mamamayan, gaya ng Electronic Business Permit and Licensing System (eBPLS), Electronic Local Civil Registry (eLCR), at Electronic Community Tax Certificate (eCedula) na maaaring ma-access online.

Sa naturang programa, binigyang-diin ng mga opisyal at ng panauhing tagapagsalita ang kahalagahan ng pagtanggap sa digital na inobasyon sa pamahalaan. Sa kanilang mga mensahe, nanawagan sila ng aktibong suporta mula sa mamamayan upang lubos na mapakinabangan ang eLGU platform at binigyang-pansin ang mahalagang papel ng mga digital na plataporma sa paghahatid ng serbisyo.

Bilang karagdagang bahagi ng aktibidad, nagsagawa rin ang Bureau of Internal Revenue (BIR) – Revenue District Office 12 ng isang Information Dissemination session hinggil sa kanilang mga umiiral na programa at serbisyo. Nagsilbi rin itong pagkakataon para sa dayalogo, kung saan malayang naipahayag ng mga dumalo ang kanilang mga tanong at alalahanin na agad namang tinugunan ng mga kinatawan mula sa BIR.

Dinaluhan ang aktibidad ng mga kawani mula sa DICT–Ifugao sa pangunguna ng panauhing tagapagsalita na si Provincial Officer Mr. Donald Trinidad, Kgg. Jaweh Habbiling, mga lokal na opisyal sa pangunguna nina Alkalde Florencio Nalula at Bise Alkalde Delfin Buligon, mga negosyante, kawani ng BIR–RDO 12, at mga empleyado ng LGU Hingyon.#